1.என் நோக்கம் நீர், என் நோக்கும் நீர்,
என் ஏக்கமும் நீரே;
என் நாட்டம் நீர், என் ஈட்டம் நீர்,
கொண்டாட்டமும் நீரே.

நீர் போதும் இயேசுவே!
நீரே எல்லாமுமே!
நீர் இல்லையேல் வாழ்வில்லையே!
நீர் போதும் என் வாழ்விலே!

2.என் நாதம் நீர், என் நாதன் நீர்,
என் வேதமும் நீரே,
என் ஆதி நீர், என் அந்தம் நீர்,
என் பாதையும் நீரே.

3.என் உயிர் நீர், என் வழி நீர்,
என் உண்மையும் நீரே,
என் மையம் நீர், என் எல்லை நீர்,
என் மெய்மையும் நீரே.

4.என் வாழ்வு நீர், என் வளம் நீர்,
என் வல்லமை நீரே.
என் மீட்பு நீர், என் தூய்மை நீர்,
என் நீதியும் நீரே.

5.என் பானம் நீர், என் ஊணும் நீர்,
என் வான ஈவும் நீர்,
என் மீட்பர் நீர், என் மேய்ப்பர் நீர்,
என் மேய்ச்சலும் நீரே.

6. ஆலயம் நீர், ஆண்டவர் நீர்,
ஆசாரியரும் நீர்,
என் பலி நீர், என் விழா நீர்,
என் தொழுகை நீரே.

7. என் ஆவல் நீர், என் ஆசை நீர்,
என் ஆதரவும் நீர்,
ஆதாரம் நீர், ஆதாயம் நீர்,
ஆசீர் எல்லாம் நீரே.

8. என் சாய்வு நீர், என் ஓய்வு நீர்,
என் ஆய்வும், தீர்வும் நீர்,
என் வீடு நீர், என் நாடு நீர்,
என் தேடலும் நீரே.